BHARATEY RAAJNEETI MEIN NAITIK MOOLYON KEE PRASANGIKTA : EK ADHYAYAN

raajneeti aur neeti paraspar ghanishthata se sambandh hain . in donon ko alag nahin kiya ja sakata arthaat raajaneeti ko neeti se aur neeti ko raajaneeti se vibhakt nahin kiya ja sakata. donon ke astitv ke lie ek doosare kee apeksha hai ya yoon kahen ki, donon hee ek doosare par aashrit hain to atishayokti nahin hogee . kuchh vidvaan to neeti shaastr ko mool tatha raajaneeti shaastr ko us par aashrit maanate hain . any vidvaan raajaneeti shaastr ko hee maulik maanate hain aur neeti shaastr ko us par aashrit maanate hain . astu koee kisee par bhee aashrit ho lekin donon ek doosare ke lie aparihaary hain aur upaadey hain . mahaan vichaarak pleton ke anusaar bhee neeti hee raajaneeti ka mool hai . arastu ke anusaar raajaneeti neeti ka mool hai . pleto raajaneetik chintan ke praneta maane jaate hain aur unake prasiddh granth di ripablik mein unhonne daarshanik shaasan ka pratipaadan kiya hai . jisake anusaar shaasak jab sadgunee ho to hee vivekapoorn shaasan karata hai aur tab raajy mein sushaasan sthaapit hota hai aur shaanti banee rahatee hai . vivekee maanav hee nyaayanishth, saty shaasan kar sakata hai . atah vivek sampann shaasak sadgunee kahalaata hai . ek vivekee shaasak ke anusaar raajy to vyakti ka viraat roop hai . yadi raajy ka vyavahaar sadgunon ke aadhaar par sampann hoga to sampoorn raajy vyavasthaon se mandit hoga . praja mein harsh aur ullaas hoga har or vyakti sadgunon se yukt hokar sukh samrddhi aur saadhanon kee praapti karega. samast vaataavaran anukoolata se yukt hoga aur yah sab kuchh tabhee sambhav hai jab raajaneeti neeti se yukt ho . vartamaan samay mein raajaneeti sushaasan ka prateek na hokar chhal, kapat aur dambh ka dharaatal ho gaee hai . jahaan pratyek padaadhikaaree apane sukh, svaarth, lobh, moh aur laabh mein lipt hokar apanee praja ke hit-ahit sabako na karate hue aage badhata chala jaata hai . is sab ka mool kaaran yahee hai ki, raajaneetik dharaatal se naitik moolyon ka hraas tejee se ho raha hai . ab koee sadgunee, shikshit, kalaavaan vyakti raajaneeti kee or kadam nahin badhaana chaahata aur jo raajaneeti ke akhaade mein koodata hai usamen naitik moolyon ka hona kapol kalpana maatr hai . vartamaan mein har ek maanav kee yahee aakaanksha hai ki, hamaara raashtr nirantar pragati kare, vikaas kee or agrasar ho aur vishv mein vikasit raashtr ke roop mein jaana jae. lekin is sabake lie bhaarateey raajaneetik dharaatal par naitik moolyon ka hona atyadhik praasangik hai .